Ze zegn je moe leren jezelven geren zien
Wa doejet zelve nie, gotter niemand je weerde vien

Ken da gedoan voer e joar of zeven
Nu zegn z'aal tis beter gesneden
tis enfeite dezesten gebleven
Mensen, zuk ippervlakkige wezes
Beter awe't soort ogen gekregen
Dan intenties were geven
Ank moen e reden geven
Is't omdak woudn roend de planete zweven

Of zwerven, etwoar in e bome me name kerven
Ogen trekken in e wereld wo datr mensen in bootjes sterven

Ken ip m'n eerste bezoek an china allene ma fabrieken gezien
in India wast meer armoede dan mystiek
De verdeeldheid en et eten makt me ziek
Peuter met in ze maag e parasiet
Enfeite moestek ier nu zest niemi zien
Soms begint me dag met een iprechte merci
Meestal ist meer van, fuck da nie opnieuw
Mo wien zienkik en wie zie gie
Verzameling sterrestof dat ip e dag weer vervaagd go zien
Overdenkende hersens dan de slaap nie viendn
Poseidon die de wereld in haat verdrienkt
Omdattiet ut zien perspectief als liefde ziet
Mo kzien de liefde kwiet en benauwd vaneur te vien
Ken e talent vo woorden en t'stukmaken va schone diengn
En moestek kunn zoek vier akkoorden zieng dat betoverd klienkt

Mo kzie gin Merlijn, ken gin invloed over de zunneschijn
En wiene datter ku regeren over us verdeeld koninkrijk
Mien schoes worden ook vuul ak tjooln deurt slijk

Of moek zeggen sliek, tis nie plat da klienkt nie sjiek
Ma dat is ik en wie zie gie,
tis na mie voet dame schoe riekt of nie?
Zet ekir e stap of tien en lot me weten ofdat ie niept
Tis e variatie op bruce banner ze misanthropie,
kzien assan blie omdak assan triest zien
En ak de juste bote vien nemek je mee no de poorten van atlantis
Ton kuwe zien wo dat ut de hand liep
Voorn dat aal't land zienkt
E wereld die in z'n eigen hebzucht verdrienkt
Omdat'nt water nie ziet dat em alles en meer bied

Leeggevist, zwart goed derin ingepist,
elke plastic bottel lik e pil ingeslikt

residu da bluft ang'n in de mage van patient moeder aarde
mensen zien erger of de zwarte plage we peizen dawe de wereld beter maken
Omdan uze schepen nu beter varen beest wordet in noorden warm lik d'evenare
Beter zoewet gif ut de lever halen,
mo wie goed wilt doen meug rekenen ip tegenslagen
Tis goed lik e profete kerek en gevek j'n ook deze kake
Kwiln m'n excuseren voer aal da kwaad dank dragen
kzien soms verdwaald, verstrooid, na de hel up boane,
goeie intenties zien de klienkers van die stroate
Ik wouden ook allene mo m'n omgeving beter maken
En de standaard omhoge alen van wuk dame doen met de tale ier in de vlaanders
Bewust over d'impressies dawe nalaten ip komende generatjes
Ke geleerd je meug noois rekenen ip 'n ander
Kzien Steve Buscemi in Las Vegas, e zieke ziel met de wereld izen anden